| {"chapters": {"1": {"cite": "Aleppo Codex [Hebrew] -- Amos 1", "verses": [{"verse": 1, "text": "דברי עמוס אשר היה בנקדים מתקוע אשר חזה על ישראל בימי עזיה מלך יהודה ובימי ירבעם בן יואש מלך ישראל—שנתים לפני הרעש"}, {"verse": 2, "text": "ויאמר—יהוה מציון ישאג ומירושלם יתן קולו ואבלו נאות הרעים ויבש ראש הכרמל {פ}"}, {"verse": 3, "text": "כה אמר יהוה על שלשה פשעי דמשק ועל ארבעה לא אשיבנו על דושם בחרצות הברזל את הגלעד"}, {"verse": 4, "text": "ושלחתי אש בבית חזאל ואכלה ארמנות בן הדד"}, {"verse": 5, "text": "ושברתי בריח דמשק והכרתי יושב מבקעת און ותומך שבט מבית עדן וגלו עם ארם קירה אמר יהוה {פ}"}, {"verse": 6, "text": "כה אמר יהוה על שלשה פשעי עזה ועל ארבעה לא אשיבנו על הגלותם גלות שלמה להסגיר לאדום"}, {"verse": 7, "text": "ושלחתי אש בחומת עזה ואכלה ארמנתיה"}, {"verse": 8, "text": "והכרתי יושב מאשדוד ותומך שבט מאשקלון והשיבותי ידי על עקרון ואבדו שארית פלשתים—אמר אדני יהוה {פ}"}, {"verse": 9, "text": "כה אמר יהוה על שלשה פשעי צר ועל ארבעה לא אשיבנו על הסגירם גלות שלמה לאדום ולא זכרו ברית אחים"}, {"verse": 10, "text": "ושלחתי אש בחומת צר ואכלה ארמנותיה {פ}"}, {"verse": 11, "text": "כה אמר יהוה על שלשה פשעי אדום ועל ארבעה לא אשיבנו על רדפו בחרב אחיו ושחת רחמיו ויטרף לעד אפו ועברתו שמרה נצח"}, {"verse": 12, "text": "ושלחתי אש בתימן ואכלה ארמנות בצרה {פ}"}, {"verse": 13, "text": "כה אמר יהוה על שלשה פשעי בני עמון ועל ארבעה לא אשיבנו על בקעם הרות הגלעד למען הרחיב את גבולם"}, {"verse": 14, "text": "והצתי אש בחומת רבה ואכלה ארמנותיה בתרועה ביום מלחמה בסער ביום סופה"}, {"verse": 15, "text": "והלך מלכם בגולה הוא ושריו יחדו אמר יהוה {פ}"}]}, "2": {"cite": "Aleppo Codex [Hebrew] -- Amos 2", "verses": [{"verse": 1, "text": "כה אמר יהוה על שלשה פשעי מואב ועל ארבעה לא אשיבנו על שרפו עצמות מלך אדום לשיד"}, {"verse": 2, "text": "ושלחתי אש במואב ואכלה ארמנות הקריות ומת בשאון מואב בתרועה בקול שופר"}, {"verse": 3, "text": "והכרתי שופט מקרבה וכל שריה אהרוג עמו אמר יהוה {פ}"}, {"verse": 4, "text": "כה אמר יהוה על שלשה פשעי יהודה ועל ארבעה לא אשיבנו על מאסם את תורת יהוה וחקיו לא שמרו ויתעום כזביהם אשר הלכו אבותם אחריהם"}, {"verse": 5, "text": "ושלחתי אש ביהודה ואכלה ארמנות ירושלם {פ}"}, {"verse": 6, "text": "כה אמר יהוה על שלשה פשעי ישראל ועל ארבעה לא אשיבנו על מכרם בכסף צדיק ואביון בעבור נעלים"}, {"verse": 7, "text": "השאפים על עפר ארץ בראש דלים ודרך ענוים יטו ואיש ואביו ילכו אל הנערה למען חלל את שם קדשי"}, {"verse": 8, "text": "ועל בגדים חבלים יטו אצל כל מזבח ויין ענושים ישתו בית אלהיהם"}, {"verse": 9, "text": "ואנכי השמדתי את האמרי מפניהם אשר כגבה ארזים גבהו וחסן הוא כאלונים ואשמיד פריו ממעל ושרשיו מתחת"}, {"verse": 10, "text": "ואנכי העליתי אתכם מארץ מצרים ואולך אתכם במדבר ארבעים שנה לרשת את ארץ האמרי"}, {"verse": 11, "text": "ואקים מבניכם לנביאים ומבחוריכם לנזרים האף אין זאת בני ישראל נאם יהוה"}, {"verse": 12, "text": "ותשקו את הנזרים יין ועל הנביאים צויתם לאמר לא תנבאו"}, {"verse": 13, "text": "הנה אנכי מעיק תחתיכם כאשר תעיק העגלה המלאה לה עמיר"}, {"verse": 14, "text": "ואבד מנוס מקל וחזק לא יאמץ כחו וגבור לא ימלט נפשו"}, {"verse": 15, "text": "ותפש הקשת לא יעמד וקל ברגליו לא ימלט ורכב הסוס לא ימלט נפשו"}, {"verse": 16, "text": "ואמיץ לבו בגבורים—ערום ינוס ביום ההוא נאם יהוה {פ}"}]}, "3": {"cite": "Aleppo Codex [Hebrew] -- Amos 3", "verses": [{"verse": 1, "text": "שמעו את הדבר הזה אשר דבר יהוה עליכם—בני ישראל על כל המשפחה אשר העליתי מארץ מצרים לאמר"}, {"verse": 2, "text": "רק אתכם ידעתי מכל משפחות האדמה על כן אפקד עליכם את כל עונתיכם"}, {"verse": 3, "text": "הילכו שנים יחדו בלתי אם נועדו"}, {"verse": 4, "text": "הישאג אריה ביער וטרף אין לו היתן כפיר קולו ממענתו בלתי אם לכד"}, {"verse": 5, "text": "התפל צפור על פח הארץ ומוקש אין לה היעלה פח מן האדמה ולכוד לא ילכוד"}, {"verse": 6, "text": "אם יתקע שופר בעיר ועם לא יחרדו אם תהיה רעה בעיר ויהוה לא עשה"}, {"verse": 7, "text": "כי לא יעשה אדני יהוה דבר כי אם גלה סודו אל עבדיו הנביאים"}, {"verse": 8, "text": "אריה שאג מי לא יירא אדני יהוה דבר מי לא ינבא"}, {"verse": 9, "text": "השמיעו על ארמנות באשדוד ועל ארמנות בארץ מצרים ואמרו האספו על הרי שמרון וראו מהומת רבות בתוכה ועשוקים בקרבה"}, {"verse": 10, "text": "ולא ידעו עשות נכחה נאם יהוה האוצרים חמס ושד בארמנותיהם {פ}"}, {"verse": 11, "text": "לכן כה אמר אדני יהוה צר וסביב הארץ והוריד ממך עזך ונבזו ארמנותיך"}, {"verse": 12, "text": "כה אמר יהוה כאשר יציל הרעה מפי הארי שתי כרעים או בדל אזן—כן ינצלו בני ישראל הישבים בשמרון בפאת מטה ובדמשק ערש"}, {"verse": 13, "text": "שמעו והעידו בבית יעקב—נאם אדני יהוה אלהי הצבאות"}, {"verse": 14, "text": "כי ביום פקדי פשעי ישראל—עליו ופקדתי על מזבחות בית אל ונגדעו קרנות המזבח ונפלו לארץ"}, {"verse": 15, "text": "והכיתי בית החרף על בית הקיץ ואבדו בתי השן וספו בתים רבים—נאם יהוה {ס}"}]}, "4": {"cite": "Aleppo Codex [Hebrew] -- Amos 4", "verses": [{"verse": 1, "text": "שמעו הדבר הזה פרות הבשן אשר בהר שמרון העשקות דלים הרצצות אביונים האמרת לאדניהם הביאה ונשתה"}, {"verse": 2, "text": "נשבע אדני יהוה בקדשו כי הנה ימים באים עליכם ונשא אתכם בצנות ואחריתכן בסירות דוגה"}, {"verse": 3, "text": "ופרצים תצאנה אשה נגדה והשלכתנה ההרמונה נאם יהוה"}, {"verse": 4, "text": "באו בית אל ופשעו הגלגל הרבו לפשע והביאו לבקר זבחיכם לשלשת ימים מעשרתיכם"}, {"verse": 5, "text": "וקטר מחמץ תודה וקראו נדבות השמיעו כי כן אהבתם בני ישראל נאם אדני יהוה"}, {"verse": 6, "text": "וגם אני נתתי לכם נקיון שנים בכל עריכם וחסר לחם בכל מקומתיכם ולא שבתם עדי נאם יהוה"}, {"verse": 7, "text": "וגם אנכי מנעתי מכם את הגשם בעוד שלשה חדשים לקציר והמטרתי על עיר אחת ועל עיר אחת לא אמטיר חלקה אחת תמטר וחלקה אשר לא תמטיר עליה תיבש"}, {"verse": 8, "text": "ונעו שתים שלש ערים אל עיר אחת לשתות מים—ולא ישבעו ולא שבתם עדי נאם יהוה"}, {"verse": 9, "text": "הכיתי אתכם בשדפון ובירקון—הרבות גנותיכם וכרמיכם ותאניכם וזיתיכם יאכל הגזם ולא שבתם עדי נאם יהוה {ס}"}, {"verse": 10, "text": "שלחתי בכם דבר בדרך מצרים—הרגתי בחרב בחוריכם עם שבי סוסיכם ואעלה באש מחניכם ובאפכם ולא שבתם עדי נאם יהוה"}, {"verse": 11, "text": "הפכתי בכם כמהפכת אלהים את סדם ואת עמרה ותהיו כאוד מצל משרפה ולא שבתם עדי נאם יהוה"}, {"verse": 12, "text": "לכן כה אעשה לך ישראל עקב כי זאת אעשה לך הכון לקראת אלהיך ישראל"}, {"verse": 13, "text": "כי הנה יוצר הרים וברא רוח ומגיד לאדם מה שחו עשה שחר עיפה ודרך על במתי ארץ—יהוה אלהי צבאות שמו {פ}"}]}, "5": {"cite": "Aleppo Codex [Hebrew] -- Amos 5", "verses": [{"verse": 1, "text": "שמעו את הדבר הזה אשר אנכי נשא עליכם קינה—בית ישראל"}, {"verse": 2, "text": "נפלה לא תוסיף קום בתולת ישראל נטשה על אדמתה אין מקימה"}, {"verse": 3, "text": "כי כה אמר אדני יהוה העיר היצאת אלף תשאיר מאה והיוצאת מאה תשאיר עשרה לבית ישראל"}, {"verse": 4, "text": "כי כה אמר יהוה לבית ישראל דרשוני וחיו"}, {"verse": 5, "text": "ואל תדרשו בית אל והגלגל לא תבאו ובאר שבע לא תעברו כי הגלגל גלה יגלה ובית אל יהיה לאון"}, {"verse": 6, "text": "דרשו את יהוה וחיו פן יצלח כאש בית יוסף ואכלה ואין מכבה לבית אל"}, {"verse": 7, "text": "ההפכים ללענה משפט וצדקה לארץ הניחו"}, {"verse": 8, "text": "עשה כימה וכסיל והפך לבקר צלמות ויום לילה החשיך הקורא למי הים וישפכם על פני הארץ—יהוה שמו"}, {"verse": 9, "text": "המבליג שד על עז ושד על מבצר יבוא"}, {"verse": 10, "text": "שנאו בשער מוכיח ודבר תמים יתעבו"}, {"verse": 11, "text": "לכן יען בושסכם על דל ומשאת בר תקחו ממנו—בתי גזית בניתם ולא תשבו בם כרמי חמד נטעתם ולא תשתו את יינם"}, {"verse": 12, "text": "כי ידעתי רבים פשעיכם ועצמים חטאתיכם צררי צדיק לקחי כפר ואביונים בשער הטו"}, {"verse": 13, "text": "לכן המשכיל בעת ההיא—ידם כי עת רעה היא"}, {"verse": 14, "text": "דרשו טוב ואל רע למען תחיו ויהי כן יהוה אלהי צבאות אתכם—כאשר אמרתם"}, {"verse": 15, "text": "שנאו רע ואהבו טוב והציגו בשער משפט אולי יחנן יהוה אלהי צבאות—שארית יוסף {ס}"}, {"verse": 16, "text": "לכן כה אמר יהוה אלהי צבאות אדני בכל רחבות מספד ובכל חוצות יאמרו הו הו וקראו אכר אל אבל ומספד אל יודעי נהי"}, {"verse": 17, "text": "ובכל כרמים מספד כי אעבר בקרבך אמר יהוה {פ}"}, {"verse": 18, "text": "הוי המתאוים את יום יהוה למה זה לכם יום יהוה הוא חשך ולא אור"}, {"verse": 19, "text": "כאשר ינוס איש מפני הארי ופגעו הדב ובא הבית—וסמך ידו על הקיר ונשכו הנחש"}, {"verse": 20, "text": "הלא חשך יום יהוה ולא אור ואפל ולא נגה לו"}, {"verse": 21, "text": "שנאתי מאסתי חגיכם ולא אריח בעצרתיכם"}, {"verse": 22, "text": "כי אם תעלו לי עלות ומנחתיכם לא ארצה ושלם מריאיכם לא אביט"}, {"verse": 23, "text": "הסר מעלי המון שריך וזמרת נבליך לא אשמע"}, {"verse": 24, "text": "ויגל כמים משפט וצדקה כנחל איתן"}, {"verse": 25, "text": "הזבחים ומנחה הגשתם לי במדבר ארבעים שנה—בית ישראל"}, {"verse": 26, "text": "ונשאתם את סכות מלככם ואת כיון צלמיכם—כוכב אלהיכם אשר עשיתם לכם"}, {"verse": 27, "text": "והגליתי אתכם מהלאה לדמשק אמר יהוה אלהי צבאות שמו {פ}"}]}, "6": {"cite": "Aleppo Codex [Hebrew] -- Amos 6", "verses": [{"verse": 1, "text": "הוי השאננים בציון והבטחים בהר שמרון נקבי ראשית הגוים ובאו להם בית ישראל"}, {"verse": 2, "text": "עברו כלנה וראו ולכו משם חמת רבה ורדו גת פלשתים הטובים מן הממלכות האלה—אם רב גבולם מגבלכם"}, {"verse": 3, "text": "המנדים ליום רע ותגשון שבת חמס"}, {"verse": 4, "text": "השכבים על מטות שן וסרחים על ערשותם ואכלים כרים מצאן ועגלים מתוך מרבק"}, {"verse": 5, "text": "הפרטים על פי הנבל כדויד חשבו להם כלי שיר"}, {"verse": 6, "text": "השתים במזרקי יין וראשית שמנים ימשחו ולא נחלו על שבר יוסף"}, {"verse": 7, "text": "לכן עתה יגלו בראש גלים וסר מרזח סרוחים"}, {"verse": 8, "text": "נשבע אדני יהוה בנפשו נאם יהוה אלהי צבאות מתאב אנכי את גאון יעקב וארמנתיו שנאתי והסגרתי עיר ומלאה"}, {"verse": 9, "text": "והיה אם יותרו עשרה אנשים בבית אחד—ומתו"}, {"verse": 10, "text": "ונשאו דודו ומסרפו להוציא עצמים מן הבית ואמר לאשר בירכתי הבית העוד עמך ואמר אפס ואמר הס כי לא להזכיר בשם יהוה {ס}"}, {"verse": 11, "text": "כי הנה יהוה מצוה והכה הבית הגדול רסיסים והבית הקטן בקעים"}, {"verse": 12, "text": "הירצון בסלע סוסים אם יחרוש בבקרים כי הפכתם לראש משפט ופרי צדקה ללענה"}, {"verse": 13, "text": "השמחים ללא דבר האמרים—הלוא בחזקנו לקחנו לנו קרנים"}, {"verse": 14, "text": "כי הנני מקים עליכם בית ישראל נאם יהוה אלהי הצבאות—גוי ולחצו אתכם מלבוא חמת עד נחל הערבה {פ}"}]}, "7": {"cite": "Aleppo Codex [Hebrew] -- Amos 7", "verses": [{"verse": 1, "text": "כה הראני אדני יהוה והנה יוצר גבי בתחלת עלות הלקש והנה לקש—אחר גזי המלך"}, {"verse": 2, "text": "והיה אם כלה לאכול את עשב הארץ ואמר אדני יהוה סלח נא מי יקום יעקב כי קטן הוא"}, {"verse": 3, "text": "נחם יהוה על זאת לא תהיה אמר יהוה"}, {"verse": 4, "text": "כה הראני אדני יהוה והנה קרא לרב באש אדני יהוה ותאכל את תהום רבה ואכלה את החלק"}, {"verse": 5, "text": "ואמר אדני יהוה חדל נא—מי יקום יעקב כי קטן הוא"}, {"verse": 6, "text": "נחם יהוה על זאת גם היא לא תהיה אמר אדני יהוה {פ}"}, {"verse": 7, "text": "כה הראני והנה אדני נצב על חומת אנך ובידו אנך"}, {"verse": 8, "text": "ויאמר יהוה אלי מה אתה ראה עמוס ואמר אנך ויאמר אדני הנני שם אנך בקרב עמי ישראל—לא אוסיף עוד עבור לו"}, {"verse": 9, "text": "ונשמו במות ישחק ומקדשי ישראל יחרבו וקמתי על בית ירבעם בחרב {ס}"}, {"verse": 10, "text": "וישלח אמציה כהן בית אל אל ירבעם מלך ישראל לאמר קשר עליך עמוס בקרב בית ישראל—לא תוכל הארץ להכיל את כל דבריו"}, {"verse": 11, "text": "כי כה אמר עמוס בחרב ימות ירבעם וישראל—גלה יגלה מעל אדמתו {ס}"}, {"verse": 12, "text": "ויאמר אמציה אל עמוס חזה לך ברח לך אל ארץ יהודה ואכל שם לחם ושם תנבא"}, {"verse": 13, "text": "ובית אל לא תוסיף עוד להנבא כי מקדש מלך הוא ובית ממלכה הוא"}, {"verse": 14, "text": "ויען עמוס ויאמר אל אמציה לא נביא אנכי ולא בן נביא אנכי כי בוקר אנכי ובולס שקמים"}, {"verse": 15, "text": "ויקחני יהוה מאחרי הצאן ויאמר אלי יהוה לך הנבא אל עמי ישראל"}, {"verse": 16, "text": "ועתה שמע דבר יהוה אתה אמר לא תנבא על ישראל ולא תטיף על בית ישחק"}, {"verse": 17, "text": "לכן כה אמר יהוה אשתך בעיר תזנה ובניך ובנתיך בחרב יפלו ואדמתך בחבל תחלק ואתה על אדמה טמאה תמות וישראל גלה יגלה מעל אדמתו {פ}"}]}, "8": {"cite": "Aleppo Codex [Hebrew] -- Amos 8", "verses": [{"verse": 1, "text": "כה הראני אדני יהוה והנה כלוב קיץ"}, {"verse": 2, "text": "ויאמר מה אתה ראה עמוס ואמר כלוב קיץ ויאמר יהוה אלי בא הקץ אל עמי ישראל—לא אוסיף עוד עבור לו"}, {"verse": 3, "text": "והילילו שירות היכל ביום ההוא—נאם אדני יהוה רב הפגר בכל מקום השליך הס {פ}"}, {"verse": 4, "text": "שמעו זאת השאפים אביון ולשבית ענוי (עניי) ארץ"}, {"verse": 5, "text": "לאמר מתי יעבר החדש ונשבירה שבר והשבת ונפתחה בר—להקטין איפה ולהגדיל שקל ולעות מאזני מרמה"}, {"verse": 6, "text": "לקנות בכסף דלים ואביון בעבור נעלים ומפל בר נשביר"}, {"verse": 7, "text": "נשבע יהוה בגאון יעקב אם אשכח לנצח כל מעשיהם"}, {"verse": 8, "text": "העל זאת לא תרגז הארץ ואבל כל יושב בה ועלתה כאר כלה ונגרשה ונשקה (ונשקעה) כיאור מצרים {פ}"}, {"verse": 9, "text": "והיה ביום ההוא נאם אדני יהוה והבאתי השמש בצהרים והחשכתי לארץ ביום אור"}, {"verse": 10, "text": "והפכתי חגיכם לאבל וכל שיריכם לקינה והעליתי על כל מתנים שק ועל כל ראש קרחה ושמתיה כאבל יחיד ואחריתה כיום מר {פ}"}, {"verse": 11, "text": "הנה ימים באים נאם אדני יהוה והשלחתי רעב בארץ לא רעב ללחם ולא צמא למים—כי אם לשמע את דברי יהוה"}, {"verse": 12, "text": "ונעו מים עד ים ומצפון ועד מזרח ישוטטו לבקש את דבר יהוה ולא ימצאו"}, {"verse": 13, "text": "ביום ההוא תתעלפנה הבתולת היפות והבחורים—בצמא"}, {"verse": 14, "text": "הנשבעים באשמת שמרון ואמרו חי אלהיך דן וחי דרך באר שבע ונפלו ולא יקומו עוד {ס}"}]}, "9": {"cite": "Aleppo Codex [Hebrew] -- Amos 9", "verses": [{"verse": 1, "text": "ראיתי את אדני נצב על המזבח ויאמר הך הכפתור וירעשו הספים ובצעם בראש כלם ואחריתם בחרב אהרג לא ינוס להם נס ולא ימלט להם פליט"}, {"verse": 2, "text": "אם יחתרו בשאול משם ידי תקחם ואם יעלו השמים—משם אורידם"}, {"verse": 3, "text": "ואם יחבאו בראש הכרמל משם אחפש ולקחתים ואם יסתרו מנגד עיני בקרקע הים—משם אצוה את הנחש ונשכם"}, {"verse": 4, "text": "ואם ילכו בשבי לפני איביהם משם אצוה את החרב והרגתם ושמתי עיני עליהם לרעה ולא לטובה"}, {"verse": 5, "text": "ואדני יהוה הצבאות הנוגע בארץ ותמוג ואבלו כל יושבי בה ועלתה כיאר כלה ושקעה כיאר מצרים"}, {"verse": 6, "text": "הבונה בשמים מעלותו ואגדתו על ארץ יסדה הקרא למי הים וישפכם על פני הארץ—יהוה שמו"}, {"verse": 7, "text": "הלוא כבני כשיים אתם לי בני ישראל נאם יהוה הלוא את ישראל העליתי מארץ מצרים ופלשתיים מכפתור וארם מקיר"}, {"verse": 8, "text": "הנה עיני אדני יהוה בממלכה החטאה והשמדתי אתה מעל פני האדמה אפס כי לא השמיד אשמיד את בית יעקב—נאם יהוה"}, {"verse": 9, "text": "כי הנה אנכי מצוה והנעותי בכל הגוים את בית ישראל כאשר ינוע בכברה ולא יפול צרור ארץ"}, {"verse": 10, "text": "בחרב ימותו כל חטאי עמי האמרים לא תגיש ותקדים בעדינו—הרעה"}, {"verse": 11, "text": "ביום ההוא אקים את סכת דויד הנפלת וגדרתי את פרציהן והרסתיו אקים ובניתיה כימי עולם"}, {"verse": 12, "text": "למען יירשו את שארית אדום וכל הגוים אשר נקרא שמי עליהם נאם יהוה עשה זאת {פ}"}, {"verse": 13, "text": "הנה ימים באים נאם יהוה ונגש חורש בקצר ודרך ענבים במשך הזרע והטיפו ההרים עסיס וכל הגבעות תתמוגגנה"}, {"verse": 14, "text": "ושבתי את שבות עמי ישראל ובנו ערים נשמות וישבו ונטעו כרמים ושתו את יינם ועשו גנות ואכלו את פריהם"}, {"verse": 15, "text": "ונטעתים על אדמתם ולא ינתשו עוד מעל אדמתם אשר נתתי להם—אמר יהוה אלהיך {ש}"}]}}} |