| {"chapters": {"1": {"cite": "Aleppo Codex [Hebrew] -- Joel 1", "verses": [{"verse": 1, "text": "דבר יהוה אשר היה אל יואל בן פתואל"}, {"verse": 2, "text": "שמעו זאת הזקנים והאזינו כל יושבי הארץ ההיתה זאת בימיכם ואם בימי אבתיכם"}, {"verse": 3, "text": "עליה לבניכם ספרו ובניכם לבניהם ובניהם לדור אחר"}, {"verse": 4, "text": "יתר הגזם אכל הארבה ויתר הארבה אכל הילק ויתר הילק אכל החסיל"}, {"verse": 5, "text": "הקיצו שכורים ובכו והיללו כל שתי יין על עסיס כי נכרת מפיכם"}, {"verse": 6, "text": "כי גוי עלה על ארצי עצום ואין מספר שניו שני אריה ומתלעות לביא לו"}, {"verse": 7, "text": "שם גפני לשמה ותאנתי לקצפה חשף חשפה והשליך הלבינו שריגיה"}, {"verse": 8, "text": "אלי כבתולה חגרת שק על בעל נעוריה"}, {"verse": 9, "text": "הכרת מנחה ונסך מבית יהוה אבלו הכהנים משרתי יהוה"}, {"verse": 10, "text": "שדד שדה אבלה אדמה כי שדד דגן הוביש תירוש אמלל יצהר"}, {"verse": 11, "text": "הבישו אכרים הילילו כרמים על חטה ועל שערה כי אבד קציר שדה"}, {"verse": 12, "text": "הגפן הובישה והתאנה אמללה רמון גם תמר ותפוח כל עצי השדה יבשו—כי הביש ששון מן בני אדם {ס}"}, {"verse": 13, "text": "חגרו וספדו הכהנים הילילו משרתי מזבח—באו לינו בשקים משרתי אלהי כי נמנע מבית אלהיכם מנחה ונסך"}, {"verse": 14, "text": "קדשו צום קראו עצרה—אספו זקנים כל ישבי הארץ בית יהוה אלהיכם וזעקו אל יהוה"}, {"verse": 15, "text": "אהה ליום כי קרוב יום יהוה וכשד משדי יבוא"}, {"verse": 16, "text": "הלוא נגד עינינו אכל נכרת מבית אלהינו שמחה וגיל"}, {"verse": 17, "text": "עבשו פרדות תחת מגרפתיהם—נשמו אצרות נהרסו ממגרות כי הביש דגן"}, {"verse": 18, "text": "מה נאנחה בהמה נבכו עדרי בקר—כי אין מרעה להם גם עדרי הצאן נאשמו"}, {"verse": 19, "text": "אליך יהוה אקרא כי אש אכלה נאות מדבר ולהבה להטה כל עצי השדה"}, {"verse": 20, "text": "גם בהמות שדה תערוג אליך כי יבשו אפיקי מים ואש אכלה נאות המדבר {ס}"}]}, "2": {"cite": "Aleppo Codex [Hebrew] -- Joel 2", "verses": [{"verse": 1, "text": "תקעו שופר בציון והריעו בהר קדשי—ירגזו כל ישבי הארץ כי בא יום יהוה כי קרוב"}, {"verse": 2, "text": "יום חשך ואפלה יום ענן וערפל כשחר פרש על ההרים עם רב ועצום—כמהו לא נהיה מן העולם ואחריו לא יוסף עד שני דור ודור"}, {"verse": 3, "text": "לפניו אכלה אש ואחריו תלהט להבה כגן עדן הארץ לפניו ואחריו מדבר שממה וגם פליטה לא היתה לו"}, {"verse": 4, "text": "כמראה סוסים מראהו וכפרשים כן ירוצון"}, {"verse": 5, "text": "כקול מרכבות על ראשי ההרים ירקדון—כקול להב אש אכלה קש כעם עצום ערוך מלחמה"}, {"verse": 6, "text": "מפניו יחילו עמים כל פנים קבצו פארור"}, {"verse": 7, "text": "כגבורים ירצון כאנשי מלחמה יעלו חומה ואיש בדרכיו ילכון ולא יעבטון ארחותם"}, {"verse": 8, "text": "ואיש אחיו לא ידחקון גבר במסלתו ילכון ובעד השלח יפלו לא יבצעו"}, {"verse": 9, "text": "בעיר ישקו בחומה ירצון—בבתים יעלו בעד החלונים יבאו כגנב"}, {"verse": 10, "text": "לפניו רגזה ארץ רעשו שמים שמש וירח קדרו וכוכבים אספו נגהם"}, {"verse": 11, "text": "ויהוה נתן קולו לפני חילו—כי רב מאד מחנהו כי עצום עשה דברו כי גדול יום יהוה ונורא מאד ומי יכילנו"}, {"verse": 12, "text": "וגם עתה נאם יהוה שבו עדי בכל לבבכם ובצום ובבכי ובמספד"}, {"verse": 13, "text": "וקרעו לבבכם ואל בגדיכם ושובו אל יהוה אלהיכם כי חנון ורחום הוא—ארך אפים ורב חסד ונחם על הרעה"}, {"verse": 14, "text": "מי יודע ישוב ונחם והשאיר אחריו ברכה—מנחה ונסך ליהוה אלהיכם {פ}"}, {"verse": 15, "text": "תקעו שופר בציון קדשו צום קראו עצרה"}, {"verse": 16, "text": "אספו עם קדשו קהל קבצו זקנים—אספו עוללים וינקי שדים יצא חתן מחדרו וכלה מחפתה"}, {"verse": 17, "text": "בין האולם ולמזבח יבכו הכהנים משרתי יהוה ויאמרו חוסה יהוה על עמך ואל תתן נחלתך לחרפה למשל בם גוים—למה יאמרו בעמים איה אלהיהם"}, {"verse": 18, "text": "ויקנא יהוה לארצו ויחמל על עמו"}, {"verse": 19, "text": "ויען יהוה ויאמר לעמו הנני שלח לכם את הדגן והתירוש והיצהר ושבעתם אתו ולא אתן אתכם עוד חרפה בגוים"}, {"verse": 20, "text": "ואת הצפוני ארחיק מעליכם והדחתיו אל ארץ ציה ושממה—את פניו אל הים הקדמני וספו אל הים האחרון ועלה באשו ותעל צחנתו—כי הגדיל לעשות"}, {"verse": 21, "text": "אל תיראי אדמה גילי ושמחי כי הגדיל יהוה לעשות"}, {"verse": 22, "text": "אל תיראו בהמות שדי כי דשאו נאות מדבר כי עץ נשא פריו תאנה וגפן נתנו חילם"}, {"verse": 23, "text": "ובני ציון גילו ושמחו ביהוה אלהיכם כי נתן לכם את המורה לצדקה ויורד לכם גשם מורה ומלקוש—בראשון"}, {"verse": 24, "text": "ומלאו הגרנות בר והשיקו היקבים תירוש ויצהר"}, {"verse": 25, "text": "ושלמתי לכם את השנים אשר אכל הארבה הילק והחסיל והגזם חילי הגדול אשר שלחתי בכם"}, {"verse": 26, "text": "ואכלתם אכול ושבוע והללתם את שם יהוה אלהיכם אשר עשה עמכם להפליא ולא יבשו עמי לעולם"}, {"verse": 27, "text": "וידעתם כי בקרב ישראל אני ואני יהוה אלהיכם ואין עוד ולא יבשו עמי לעולם {פ}"}]}, "3": {"cite": "Aleppo Codex [Hebrew] -- Joel 3", "verses": [{"verse": 1, "text": "והיה אחרי כן אשפוך את רוחי על כל בשר ונבאו בניכם ובנותיכם זקניכם חלמות יחלמון—בחוריכם חזינות יראו"}, {"verse": 2, "text": "וגם על העבדים ועל השפחות בימים ההמה אשפוך את רוחי"}, {"verse": 3, "text": "ונתתי מופתים בשמים ובארץ דם ואש ותימרות עשן"}, {"verse": 4, "text": "השמש יהפך לחשך והירח לדם—לפני בוא יום יהוה הגדול והנורא"}, {"verse": 5, "text": "והיה כל אשר יקרא בשם יהוה—ימלט כי בהר ציון ובירושלם תהיה פליטה כאשר אמר יהוה ובשרידים אשר יהוה קרא"}]}}} |